Sosue 14

'Blʋa Israɛ -nyʋ 'jea -ɛ -jea ʋʋa' dɛ nɩ 'de Kanaa blʋa 'di ɩ ka. 'Sraa -sai Eleasa ke Nunɩ 'a "ju Sosue' ke, Israɛ -nyʋ 'a 'blʋa 'a 'blowɔn 'ɔ -gbɛin" 'a "jrukpɔ i -tenyʋ -a -te' ʋʋpʋ kwa woi, -wɛe ʋʋ -se' 'ɛ 'ʋn ʋʋ "nyɩ ʋʋpʋ. 2 Ʋʋ 'wɔɛn 'ʋn -seea' -tɩ 'de 'blʋa 'a 'blowɔn -mɛ" nyɛ 'e tɔo 'nynɩ -wɛe ɛ 'je ʋʋpʋ 'a dɛ 'kpa a, ɛ ʋʋ poɛ soa', ka Nyɔsoa "sia ɛɛ' 'nynɩ 'de Moisɩ 'kwa -wɛe ɔ 'tmʋɛ ɛ; 3 Dɛ-nʋɛ' Moisɩ "nyɩɛ 'blʋa 'a 'blowɔn 'sɔɔn 'e tɔo 'a 'kɛn 'mɛ 'de Sudɛn 'ɛ 'jrʋ 'a 'wlʋʋ 'ɩn 'de ɔ se Lefi -wi" -mʋ "nyɩ, 4 'Kaa Sosɛu 'a "nynuʋ nmai nynuu, Manase ke Eflaimʋ -mʋ nʋɛ 'blʋa 'a 'blowɔn 'sɔɔn. Ɛmɛ -tɩ ɔ se Lefi -wi" 'kɛn "nyɩ 'de 'blʋa -nɛ 'di -bo ɛ se "kwi -kwlɔ deejrɩ' ke ɩa' 'kwla -nɩ 'dei ʋʋ 'jea 'di -te, ʋʋ 'jea ʋʋa' "nɔdɩ po 'de ʋʋ 'jea ʋʋa' dɩ i -te' nɩ ɛ. 5 Ka Nyɔsoa "sia ɛɛ' 'nynɩ 'de Moisɩ -pee ʋʋ 'jea 'blʋa 'ʋn -seea sʋn nʋ ɛ, 'kamɔ Israɛ -nyʋ nʋ.

6 Suida 'a 'blʋa 'a 'blowɔn 'ɔ nyʋ deejrʋ' jiɛ Sosue' wo 'de Kilgalɩ. Jefune' 'a "ju Kalɛbʋ o, Kenisɩ -ɩ mɔ -wlu ɔ -pee ka ɔ 'na: -Ɩn -juo wlu "klein Nyɔsoa -tua" Moisɩ -nɩa Kea 'a dbo nʋɩ 'de 'ɩn ke -ma -tɩ' 'ʋn 'mɛ, -ta -a -nɩa 'de Kadɛsɩ Banea' a. 7 'Ɩn 'beɛ -sʋn 'a kwla -nyiiɛ' -ta Moisɩ -nɩa Nyɔsoa 'a dbo nʋɩ dboa 'ʋn 'de Kadɛsɩ Banea' a 'de 'ɩn 'je ɛɛ' 'blʋa tu "jrɛɛ ɛ. 'Ɩn jia de ɛ, 'ɩn poɔ "kuan 'de pɛe -wee' 'ʋn. 8 -Ta nyʋ -ke 'ʋn mua a cɛan nyʋ 'a dɩ ɛ, -mɛ 'ɩn se wlu "kpei 'de Nyɔsoa 'ma Kea 'a -tɩ' 'ʋn. 9 Ɛɛ' 'wɩ tu o ɛ, Moisɩ cɛn wlu -tie" ka ɔ 'na: 'Ma -srɛɛn', 'blʋa -ma -wlʋa 'dii plea' a muɛ -ɩn -ke -ma "nynuu 'a dɛ 'kpa 'a 'de nɔ" "o nɔ" -wee' 'di dɛ-nʋɛ' mɛ -nɩ -ma 'a 'wlʋ wlu "kpei i 'de Nyɔsoa 'ma Kea 'a -tɩ' 'ʋn! 10 Tɔ' -tɩ -cɛɛn'-, ɛ -jea -sʋn 'a kwla -nyiiɛ' 'jɔ -mm" nʋ mɛ Nyɔsoa 'tmʋ wlu -nɛ 'de Moisɩ -pee -mɛ Israɛ -nyʋ nɩɛ naa' 'de -pɩɩɔn" blʋa 'di, -wɛe ɛ "nyɩ 'ʋn 'kmʋ nɩa' ka ɛ cɛan ɛɛ' wlu -tie" ɛ. 'Ɩn 'bleɛ -sʋn 'a kwla -mɛ" na 'jɔ -mm" -sɩan 11 'ɩn 'bleɛ 'kpɩ ka 'ɩn 'bleɛ -sɔo -ta Moisɩ a dboa 'ʋn ɛ; 'ɩn 'bleɛ 'kpɩ kaa 'ɩn 'bleɛ 'dee ɛ, -bo ɛ nɩ 'ɩn 'je tʋ -fʋn o, -bo ɛ nɩ 'ɩn 'je "sooa -wi" 'mla kɔn o. 12 Kaan ka la -ɩn "nyɩ 'ʋn 'blʋa 'a 'fɔ crʋ nɩa 'nynɩ woi ka Nyɔsoa 'tmʋɛ ɛ. Ɛɛ' nɔ" tu 'di ɛ, Anakɩ -nyʋ mʋ -ti" 'de ɛɛ' "kwi -kwlɔ -poa -gblo" 'dei 'di. -Bo Nyɔsoa -te' 'ʋn kwa wɔi ɛ 'ma muɛ ʋʋpʋ i -saa' ka ɛ "sia ɛɛ' 'nynɩ ɛ. 13 Sosue' poɛ Jefune' 'a "ju Kalɛbʋ "diwan -wɛe ɔ "nyɩɔ Eblɔn blʋa ɛ 'je ɔɔ' 'kɛn nɩ-. 14 Ɛmɛ -tɩ Eblɔn nɩ Jefune' -wlʋa Kenisɩ 'a "ju Kalɛbʋ 'a "nynuu 'a 'kɛn -sɩan ke, dɛ-nʋɛ' ɔ kpʋʋn ɛ wlu "kpei i 'de Nyɔsoa Israɛ -nyʋ 'a Kea 'a -tɩ' 'ʋn. 15 Tɛin" 'de ɛ, nyʋ a 'daa Eblɔn Kiliatɩ Aaba, ɛmɛ -nɩ Anakɩ 'a klaa" a 'nynɩ. 'Sʋ 'blʋa -wee' -teɛ 'flɛʋn, tʋ nyna i.